Home ເຊກອງ ແຕ່ງຕັ້ງສະຫາຍ ປອ. ຕຸລາວັນ ວົງໄຊ ເປັນເລຂາຊາວໝຸ່ມແຂວງເຊກອງຄົນໃໝ່

ແຕ່ງຕັ້ງສະຫາຍ ປອ. ຕຸລາວັນ ວົງໄຊ ເປັນເລຂາຊາວໝຸ່ມແຂວງເຊກອງຄົນໃໝ່

April 29, 2019 0

•   ຂ່າວ : ສັນຍາ           ພິທີມອບ-ຮັບໜ້າທີ່ລະຫວ່າງຜູ້ເກົ່າ-ຜູ້ໃໝ່ ແລະການປະກາດແຕ່ງຕັ້ງເລຂາຄະນະບໍລິຫານງານຊາວໝຸ່ມແຂວງເຊກອງຜູ້ໃໝ່ໄດ້ມີຂຶ້ນໃນວັນທີ 29 ເມສາ 2019 ທີ່ສະໂມສອນແຂວງ ໂດຍໃຫ້ກຽດເຂົ້າຮ່ວມເປັນປະທານຂອງທ່ານ ສີດາ ສຸວັນນະສາຍ, ຮອງເລຂາພັກແຂວງ, ຮອງເຈົ້າແຂວງໆເຊກອງ, ພ້ອມນີ້ ກໍມີຫົວໜ້າ-ຮອງພະແນກ, ຫ້ອງການ-ອົງການທຽບເທົ່າ ແລະພາກສ່ວນກ່ຽວຂ້ອງເຂົ້າຮ່ວມ.
 ການຈັດພິທີຄັ້ງນີ້ ແມ່ນປະຕິບັດຕາມຂໍ້ຕົກລົງຂອງທ່ານເຈົ້າແຂວງໆເຊກອງ ວ່າດ້ວຍການຍົກຍ້າຍທ່ານ ສາກົນພອນປະເສີດ ເລຂາຄະນະບໍລິຫານງານຊາວໝຸ່ມແຂວງເຊກອງຜູ້ເກົ່າໄປຮັບໜ້າທີ່ໃໝ່ຢູ່ພະແນກແຜນການ ແລະການລົງທຶນ ແລະມະຕິຕົກລົງຂອງຄະນະປະຈໍາພັກແຂວງ ວ່າດ້ວຍແຕ່ງຕັ້ງສະຫາຍ ປອ. ຕຸລາວັນ ວົງໄຊ ຮອງຫົວໜ້າພະແນກໂຍທາທິການ ແລະຂົນສົ່ງ ແຂວງເປັນຜູ້ວ່າການເລຂາຄະນະບໍລິຫານງານຊາວໝຸມແຂວງເຊກອງຄົນໃໝ່.


 ໂອກາດດັ່ງກ່າວ ທ່ານ ສາກົນ ພອນປະເສີດ ໄດ້ລາຍງານການນໍາພາວຽກງານໃນໄລຍະ 5 ປີຜ່ານມາ ໃຫ້ຮູ້ວ່າ: ຕະຫຼອດໄລຍະຜ່ານມາຄະນະພັກ-ຄະນະບໍລິຫານງານຊາວໝຸ່ມແຂວງພວກເຮົາໄດ້ເອົາໃຈໃສ່ສຶກສາອົບຮົການເມືອງນໍາພາແນວຄິດ ໂດຍໄດ້ນໍາເອົາແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ມະຕິຄໍາສັ່ງ, ແຈ້ງການແນະນໍາ ແລະມູນເຊື້ອປະຫວັດຄວາມເປັນມາຕ່າງໆມາຈັດຕັ້ງເຜີຍແຜ່ ແນໃສ່ໃຫ້ສະມາຊິກພັກ, ພະນັກງານ-ລັດຖະກອນເຂົ້າໃຈແນວທາງການປ່ຽນແປງໃໝ່ຢ່າງມີຫຼັກການຂອງພັກ, ເຂົ້າໃຈຕໍ່ໜ້າທີ່ວຽກງານວິຊາສະເພາະຄວາມຮັບຜິດຊອບຂອງຕົນ ແລະພ້ອມກັນປະຕິບັດສາມາດຍາດໄດ້ຜົນສໍາເລັດເປັນກ້າວໆມາ.

 ກົງຈັກການຈັດຕັ້ງຊາວໝຸ່ມທົ່ວແຂວງໃນປະຈຸບັນ ມີ 1 ພະແນກ 9 ຮາກຖານ 384 ໜ່ວຍ ໃນນີ້ຂັ້ນແຂວງມີ 9 ຮາກຖານ 84 ໜ່ວຍ ແລະຂັ້ນເມືອງ 315 ໜ່ວຍ ຊຶ່ງໃນນີ້ໄດ້ຮັບຮອງເປັນຄະນະຊາວໝຸ່ມ 4 ບຸກແລ້ວ ມີ 4 ເມືອງ 1 ພະແນກ 9 ຮາກຖານ 311 ໜ່ວຍ ແລະມີສະມາຊິກຊາວໝຸ່ມ-ໄວໝຸ່ມໃນເກນອາຍຸ 15-35 ປີທັງໝົດ 42.937 ຄົນ,ຍິງ 20.330 ຄົນ ແລະມີຊິກມາຊິກຊາວໝຸ່ມ 16.681 ຄົນ,ຍິງ 6.712 ຄົນ.  ຫຼັງຈາກນັ້ນ ກໍໄດ້ມີພິທີເຊັນບົດບັນທຶກມອບ-ຮັບໜ້າທີ່ລະຫວ່າງເລຂາຄະນະບໍລິຫານງານຊາວໝຸ່ມ ປປ ລາວແຂວງເຊກອງຜູ້ເກົ່າ-ຜູ້ໃໝ່, ພ້ອມທັງຮັບຟັງການໂອ້ລົມຂອງທ່ານ ສີດາ ສຸວັນນະາສຍ ຊຶ່ງທ່ານໄດ້ເນັ້ນໃຫ້ເລຂາຄະນະບໍລິຫານງານຊາວໝຸ່ມແຂວງຜູ້ໃໝ່ເອົາໃຈໃສ່ສືບຕໍ່ປະຕິບັດໜ້າທີ່ວຽກງານໃຫ້ມີຜົນສໍາເລັດໃໝ່ທີ່ດີຂຶ້ນກວ່າເກົ່າ.  ໂອກາດດຽວກັນນີ້ ຍັງໄດ້ຜ່ານມະຕິຕົກລົງຂອງຄະນະປະຈໍາພັກແຂວງ ວ່າດ້ວຍແຕ່ງຕັ້ງສະຫາຍ ແສງໂນພາ ມິກດາວົງ ຄະນະບໍລິຫານງານຊາວໝຸ່ມແຂວງ, ຂຶ້ນເປັນຮອງເລຂາຄະນະບໍລິຫານງານຊາວໝຸ່ມແຂວງເຊກອງຕື່ມອີກ.

--------------------------------

© All in LAOS

ຂ່າວທ້ອງຖິ່ນ ເຊກອງ